Санкт-Петербургда 14 адамдын өмүрүн алган жардыруудан кийин теги борборазиялык алты адам кармалды. Бул тууралуу Федералдык иликтөө комитети 5-апрелдеги билдирүүсүндө кабарлады.
Расмий маалымат боюнча азырынча кармалгандардын дүйшөмбү күнкү метродогу жардырууну уюштурду делген адам менен байланышы бар же жогу тастыктала элек. Алар "Ислам мамлекети" жана "Ал-Нусра фронту" сыяктуу Орусияда тыюу салынган исламчыл согушкерлер топторуна жарандарды азгырган жана террорчул аракеттерге шыктандырган" деп шектелип жатат.
Кармалгандар Орусияга иштегени келгени аныкталды. Укук коргоо уюмдары Санкт-Петербургдагы мигранттарга кайрылып, полициянын рейддери күчөгөндүктөн коомдук жайларга көп чыкпоого чакырды.
Орусиянын иликтөөчүлөрү Санкт-Петербургдагы чабуулду Кыргызстанда төрөлгөн орус жараны уюштурду деп билдирген.