21-22-январда Түркиянын борбору Анкара шаарында кыргыз-түрк ишкерлеринин бизнес форуму өттү. Форумдун негизги максаты ЕАЭБге киргенден кийинки Кыргызстан менен Түркиянын экономикалык кызматташтыгын өнүктүрүүнү көздөдү. Иш-чарага Кыргызстандан 100дөн ашык, Түркиядан 150гө жакын ишкер катышты. Эки күн ичинде өз ара тажрыйба алмашуу, инвестиция тартуу жаатында эки тараптуу сүйлөшүүлөр жүрдү. “Азаттыктын” кабарчысы Улан Эгизбаев форумдун катышуучуларын кепке тартып, кандай жаңы демилгелер айтылып, ишкердик сунуштар берилгенин сурады.
Катышуучулар: Айбек Сарыгул, Түркиядагы достук, кызматташтык уюмунун башчысы, Нурлан Мүсүралиев, Кыргызстандын соода, өнөр жай палатасынын вице-президенти, Айнура Үсөнбекова, Экономика министрлигинин ишкерлерди жөңгө салуу башкармалыгынын башчысы жана Умбриэль Темиралиев, Жаш ишкерлер ассоциациясынын бизнес бирлигинин башчысы.
Анкарада өтүп жаткан кыргыз-түрк бизнес форуму уланууда. Бүгүн эки өлкөнүн ишкерлери бетме-бет сүйлөшүүлөрдү жүргүзөт. Уюштуруучулардын айтымында, эки тараптуу жолугушууларга 230 ишкана өкүлү катышып жатат. Бүгүн түштөн кийин кыргыз ишкерлери Түркиянын ОСТИМ өндүрүш борбору менен жакындан таанышат. Ал жерде 5200 ишкана товарлардын 190 түрүн өндүрүп, 17 өлкөгө экспорттойт. Иш-чарага Кыргызстандын Түркиядагы элчиси Ибрагим Жунусов, эки өлкөнүн соода, өнөр жай палаталарынын башчылары да катышууда.
Кыргыз-түрк ишкерлер форумуна жеринен байкоо салып жаткан кабарчыбыздын айтымында, кыргыз ишкерлери эртең, 22-январда Түркиянын Орто чыгыш өнөр жай жана соода борбору - ОСТИМ менен жакындан таанышат. ОСТИМ - Анкарада жайгашкан 5200 ишканадан турган өндүрүш аймагы. Ал жерде товардын 190 түрү чыгып, дүйнөнүн 17 өлкөсүнө экспорттолот. 5 млн. чарчы метр аймактагы бул өндүрүш аймагында 60 миң киши иштейт.
