Эл аралык Amnesty International уюму Пакистандагы 500гө жакын адамды өлүм жазасына тартуу чечимине тынчсыздануусун билдирди. Уюм тараткан билдирүүдө мындай чечим жарандарды талибдердин зордук-зомбулугунан коргоо үчүн жардам бере албайт.
Уюмдун Азия-Тынч океан аймагы боюнча директорунун орун басары Дэвид Гриффитс 22-декабрда “көп сандагы адамды өлүм жазасына тартуу, тынч жарандардын коопсуздугун сактамай тургай, өлкөдө зордук-зомбулуктун деңгээлин жогорулатышы мүмкүн” деп билдирди.
Пакистан бийлиги терроризм үчүн айыпталып, өлүм жазасы өкүм кылынган беш жүзгө чукул адамды дарга асуу жакынкы жумаларда аткарыла баштарын билдирген.
Премьер-министр Наваз Шариф өлүм жазасына коюлган мораторийди мектепке болгон чабуулдан соң алдырып салган. Буга 16-декабрда Пешавардагы мектепке жасалган террордук чабуул себеп болду. Анда 140тан ашык киши, анын ичинде 132 окуучу мерт кеткен.
