Сыйлык алгандардын арасында "Азаттыктын" кабарчысы Уланбек Эгизбаевдин "Кыял" аттуу кыска метраждуу тасмасы бар. Ал элдин үнү категориясында "Мыкты видео" номинациясын жеңип алган. Видео тасма Кочкор районунда жашаган тубаса майып Нургазынын кыялын жана максаттарын чагылдырат. Нью-Йорктогу сыйлык алуу аземине Уланбек Эгизбаев менен кошо тасманын каарманы Нургазы да барды.
Webby Awards интенет сынагына быйылкы жылы 70ке чукул өлкөдөн 13 миң видео тасма катышты.
- Нью-Йорктогу Webby awards сыйлыгын тапшыруу аземи кандай өттү?
Улан Эгизбаев: Сыйлык тапшыруу аземи кечээ кечинде болду. Ал жакка көптөгөн АКШнын атактуу жылдыздары келишти. Сыйлык тапшыруунун эрежеси боюнча катышуучулар беш сөздөн ашпаган өз оюн ураан катары айтыш керек эле. Нургазы экөөбүз “Everyone can dream and win” (ар бир адам кыялдана алат жана жеңе алат) деген сөздү ураан катары кармадык. Сыйлык тапшыруу аземинде чоң экран аркылуу биздин тасма көрсөтүлдү. Нургазы экөөбүз тең калпак кийип алып, тасмага тартылгандыктан аларга жакшы көрүндү окшойт.
- Нургазынын эмоциялары тууралуу да айтсаңыз. АКШны көргөндөн кийин кандай таасирде калды, деги эле өзүн кандай сезип жатат?
Улан Эгизбаев: Нургазынын эмоцияларында чек жок. Келгенден бери эле жаңы чөйрөнү кызыгуу менен көрүп, кубанып жүрөт. Менин дагы бир байкаганым, Нургазы буга чейин тил үйрөнүү боюнча айткан эмес эле. Азыр болсо “англисче үйрөнүш керек экен” деп бир башкача сезимдер ойгонгону байкалып жатат. Тилге аябай эле кызыгып калды. Англисче ага кайрылып сүйлөп калса, кээ бир сөздөрдү байкап, кантип которуларына кызыгуусу өзгөчө болуп жатат.
Нургазыны күн сайын кооз жерлерге, Нью-Йорктогу таанымал жайларга алып барганга аракет кылып жатабыз. Мисалы, келгенде Манхэттенди аралап, Уолл-стритке, океандын жээгине бардык, дагы бир катар райондорду кыдырдык. Айтор Нургазынын кубанычын сөз менен айтып берүү кыйын, бир сөз менен мен анын кубанычынан күндөн-күнгө жаңы мүнөздөрүн байкап атам.
- Webby awards сыйлыгын “Интернет Оскары” деп да атап коюшат экен. Сыйлыктын мааниси жана масштабы тууралуу айтып берсеңиз. Бул эмне сыйлык, америкалыктар өздөрү бул сыйлыкка кандай маани беришет экен?
Улан Эгизбаев: Webby awards сыйлыгынын быйыл уюшулганына 20 жыл толуп отурат. Бул жакта бул сыйлыкты “Интернет Оскары” деп атап койгону чын.
Быйыл 65 өлкөдөн катышуучулар келди. Америкалыктар өздөрү дагы бул сыйлыкка чоң маани беришет экен. Алсак, быйылкы салтанатка дүйнөлүк жылдыздардан Жессика Альба, Ким Кардашьян сыяктуу таанымал адамдардын катышуусу сыйлыктын аброю канчалык экенин айтып турат.
Көпчүлүгү биздин ушундай маанилүү сыйлыкты кантип утуп калганыбызды таң калып сурап жатышат. Алардын таң калуусун деле түшүнсө болот. Себеби тандоо критерийи ар кандай болуп жатпайбы. Мисалы, биздин тасма Нургазынын кыялы тууралуу болуп жатса, башка тасмаларда ар түрдүү критерийдеги видеолор болуп жатат.
- Нью-Йоркто кыргызстандыктар арбын экенин билебиз. Алар кандай тосуп алышты, алдыда дагы эмнени пландап жатасыздар?
Улан Эгизбаев: Бул жактагы мекендештер бизди абдан жылуу тосуп алышты. Аэропорттон түшкөндөн бери бизди алыс кетирбей жаныбызда жүрүшөт. Нью-Йорктун булуң-бурчун көрсөтүшүп, айрыкча Нургазыга жардамдарын аягысы келишкен жок. Алсак, Нургазыга акчалай жардам беришип, жакшы сөздөрүн аяшпай, Нургазыга кыялынын бардыгы орундалат деп дем-күч берген сөздөрүн айтып жатышат.
Алдыда Чикагого учуп кетебиз. Ал жакта дагы мекендештер чогулуп, көргөзмө өткөрүп, андан түшкөн каражатты Нургазыга жардам катары беребиз деп жатышат. Ошондой эле Вашингтонго барып элчи менен жолуксакбы деген пландарыбыз дагы бар. Менимче, элчи менен жолугушуу Нургазынын келечегине чоң стимул болот болушу керек.
Сыйлык тапшыруу аземинен сүрөт баян:
"Нургазынын кыялы" Webby сыйлыгын алды
