Линктер

жекшемби, 11-декабрь, 2016 Бишкек убактысы 04:25

Депутаттык комиссия мурдагы баш прокурордун бийлик адамдарынын чуулгандуу иштери жөнүндө маалыматына далил тапкан жок.

Ал эми банк ячейкаларынан миллиондогон акчалардын алынышына жана Кубатбек Байболовдун баш прокурор кызматын пайдаланган фактысына Баш прокуратура укуктук баа берсин деген тыянакка келди.

Чуулгандуу фактылардын чын-бышыгы чыкпадыбы?

Мурдагы баш прокурор Кубатбек Байболов ачыкка чыгарган коомчулукту дүңгүрөткөн чуулгандуу фактылардын чын-бышыгын териштирүү үчүн түзүлгөн депутаттык комиссия өзүнүн тыянагын ишемби күнү жарыя кылды. Анда биринчи вице-премьер Өмүрбек Бабановдун мамлекетке 730 млн. сом салыкты төлөбөй койгону, ишкер Валерий Хондун мүлкүн тартып алганы жана сабаттырганы, “Альфа телеком” компаниясын рейдерлик жол менен тартып алуу аракети жана орус инвесторлорунан 50 млн. доллар сураганы жөнүндөгү маалыматтар ырасталган жок деп айтылат.
Кызматынан убактылуу чегинген биринчи вице-премьер-министр Өмүрбек Бабанов

Аталган комиссия ошондой эле банк ячейкаларынан алынган миллиондогон акчаларды убактылуу өкмөт кандай жумшагандыгын Баш прокуратура укуктук жактан аныктасын деген тыянакка келген. Мамлекеттик коопсуздук комитетинин адамдарды мыйзамсыз тыңшап жатканы жана бир млн. 600 миң долларды туура эмес жумшагандыгы жөнүндө, “Дастан” корпорациясынан жашыруун жабдуулар сатылып, акчасы социал-демократтардын шайлоо кампаниясына жумшалганы, президент Роза Отунбаеванын бир тууган сиңдисине болушуп соттун ишине кийлигишип жатканы, депутат К. Исаевге козголгон кылмыш иштери жөнүндө маалыматтарга дагы далил табылган эмес.

Комиссия Кубатбек Байболовду баш прокурордун милдетин аткарып турган учурда саясий жана жеке максатка кызматын пайдаланып, “Алфа-телекомдогу уурдалган акчалар жөнүндө кылмыш ишин негизсиз кыскартып койгон деп ырастап, анын иш-аракеттеринде кызматтык кыянатчылык же коррупция бар-жок экенин Баш прокуратура текшерип чыгышы зарыл деп эсептейт.

Депутаттык комиссия бир гана фактыны, Бажы комитетинин төрагасы Кубанычбек Кулматовдун Россия жараны экени жөнүндө маалыматтын чын чыкканын ырастады.

Кубатбек Байболов өз кезегинде депутаттык комиссиянын отчетун шашып чыгарылган жана каралоо максатын көздөгөн жыйынтык деп сынга алууда.

- Бул комиссия мени каралоонун комиссиясы. Отуз жетинчи жылдын илебин мен тарыхчы катары абдан сезип атам. Бүткүл мамлекеттик мүмкүнчүлүктөрдү мобилизациялоо жолу менен мени жок кылуунун саясаты жүрүп жатат, - деди Байболов "Азаттыкка".

Маселени дагы бир депутаттык комиссия териштирүүдө

Кубатбек Байболов өзү билдирген чуулгандуу иштерди ырастаган документтерди "атамекенчи" депутат Өмүрбек Абдракманов жетектеген комиссияга бергенин, ошол комиссия бийлик төрүндөгү кыңыр иштер боюнча олуттуу далилдерди таап жатканын айтты.
Мурдагы баш прокурор Кубатбек Байболов

Байболовдун парламентте билдирген маалыматтарын текшерүү боюнча ЖКнын каржы жана бюджет, коррупцияга каршы күрөшүү комитеттери дагы өзүнчө комиссия түзүшкөн. Бул комитеттерди парламентте оппозицияда турган “Ата Мекен” жана “Ар-Намыс” фракциялары жетектешет. Өмүрбек Абдракманов ушул эки комитет түзгөн комиссия жаңырган жумада Өмүрбек Бабановду чакырып маалымат алып, жыйынтыгын жуманын этегинде чыгарарын билдирди.

Кубатбек Байболовдун жубайы башы чырдан чыга элек “Мегаком” уюлдук операторунун ээси “Альфа-Телекомго” жалпы баасы 1 млн. 700 миң доллар турган үч кыймылсыз мүлк сатканы жөнүндө маалыматтар ачыкка чыккандан кийин президент моралдык-этикалык негизге таянып, аны баш прокурор кызматынан алган. Ошондо Кубатбек Байболов парламентке чакырылып, ошол жерде Коопсуздук комитети, Бабанов, Отунбаева жөнүндө чуулгандуу фактыларды ачыкка чыгарып, аны териштирип чара көрүүгө чакырган. Өмүрбек Бабанов премьер-министрге арыз жазып, ага коюлган күнөөлөр териштирилгичекти бир айга кызматын өткөрүп берген.

Ошентип СДПК фракциясынын мүчөсү Т. Туманов жетектеген комиссия чуулгандуу эчтеке таппаса, “атамекенчи” Ө. Абдракманов баштаган комиссия убактылуу өкмөт мүчөлөрүнүн, биринчи вице-премьердин, коопсуздук комитетинин олуттуу күнөөлөрү бар деген жолдо баратат. Байкоочулардын баамында, бул жерде бийлик мунарасында президенттик шайлоо алдында күч алган саясий күрөш болуп жаткандыктан чуулгандуу иштердин бети ачуу оңой маселе болбойт.

пикирлерди көрсөт

XS
SM
MD
LG