Кыргыз аялдарынын улуттук көйнөктөрүндөгү өзгөчө стилдер менен заманбап кийимдердин айкалышынан турган коллекцияда 22 көйнөк көрсөтүлдү. Он жылдан ашуун Европада жашап, Улуттур Уюмунун Венадагы кеңсесинде эмгектенген Гүлнур Тоялиева өзү ойлоп таап, тиккен көйнөктөрү дүйнөлүк модада бурулуш жасаарына ишенет. Көрсөтмө соңунда Гүлнур айым "Азаттыкка" чакан маек курду.
Гүлнур: 20дан ашык көйнөк көрсөтүлдү. Көрсөтмө аябай узак болуп, көрүүчүлөрдүн баарына жакты, көңүлдөрү жайдары кетишти. Себеби көйнөктөр ачык, жайдары түстө. Жибектен, колдо жасалган көп нерселер көрсөтүлдү. Мындай моделдер Европада абдан аз болот. Ошондуктан бардыгына аябай жакты окшойт.
"Гүлнур" көрсөтмөсү, Вена, 19-сентябр, 2011-жыл
«Азаттык»: 22 көйнөктү даярдоо, 22 кызды кийинтип эл алдына алып чыгуу машакаттуу эмгек болсо керек. Ушунун баарын өзүңүз уюштурасызбы?
Гүлнур: Абдан көп даярданууга туура келди. Мен бир ишти колго алганда аны аягына чейин аткарышым керек. Мен абдан жакшы даярдандым, жардамчыларым дагы бар. Эки чебер кыз көйнөктөрдү даярдаганга жардам берди. Менин биринчи көрсөтмөм июнда өткөн, ошондон улам кандай өткөрүштү билип калдым. Көрсөтмөнү өткөрүүгө кыргыз элчилиги да абдан жардам берди.
«Азаттык»: Көйнөктөрдүн ажарын чыгарып кийип, басып өткөндү чебер кыздар аткарат да, сиз андай кыздарды кайдан табасыз?
Гүнур: Алар моделдер. Кыргызстандан кыздарды тандагам, алар катышты. Австриядан дагы кыздар болду, аларга көйнөктөр аябай жакканын айтышты. Менин көйнөктөрүм өзгөчө, азыркы Кыргызстандагы жаңы багыттан айырмаланат. Менин модам саркеч кийимдер. Менин көйнөктөрүмдү кинофестивалдарда кийишет деген тилегим бар.
«Азаттык»: Сиз алектенген чыгармачылыктын түрү - жогорку мода абдан көп каражатты талап кылган искусствонун түрү болуп саналат. Сизге каражат жагынан ким жардам берет?
"Гүлнур" көрсөтмөсү, Вена, 19-сентябр, 2011-жыл
Гүлнур: Эч ким жардам бербейт. Бардыгын мен өзүм даярдап, өзүм жасап жүрөм. Мындай ишти башташтын алдында кичине инвестиция жасаш керек, албетте. Мен муну долбоор катары алдыма койгом, ошого жараша каражатты бөлүштүрөм. Мындан ары эгерде элге менин моделдерим жакса, бул акча кайра көп эсе болуп кайтарылышы мүмкүн.
«Азаттык»: Ошол эле учурда азыр Кыргызстанда сизге окшогон айымдар, жигиттер бул тармакта жаңы нерселерди жасап жатышат. Кыргызстандык адистер менен бирге иштешүү пландарыңыз барбы?
Гүлнур: Бирин-экин жаңы дизайнерлерди билем. Бирок өз ишимди башкалар менен салыштырбайм. Менин өз багытым бар - минималистмин. Канчалык кездеме эксклюзивдүү болсо, ошончолук курак, сайма деген азыраак болуш керек. Ошон үчүн мен бардык дизайнерлер менен иштеше албасам керек. Кыргызстандан азыр аябай көп кызыккандар, сунуштар болуп атат. Мен бул жерде жалгыз эле аракет кылып жүрбөстөн, дизайнерлер менен чогуу иштешсем кызыгыраак, жеңил болушу мүмкүн.
«Азаттык»: Гүлнур айым, алдыңыздагы чоң максатыңыз эмне?
Гүлнур: Менин максатым - Кыргызстанды чет мамлекетке таанытууга өз салымымды ушул чыгармачылыгым аркылуу кошсом деген тилек. Мен патриотмун, кайсы жерде болбосом да жүрөгүм Кыргызстанда.
"Гүлнурдун" ээси-дизайнери Гүлнур Тоялиева, Вена, 19-сентябр, 2011-жыл
«Азаттык»: Сиздин максаттар ишке ашышына биз дагы тилектешпиз. Ошол эле учурда көркөм мода дүйнөдөгү эң катуу атаандаштыкты жараткан өзүнчө индустрия. Кыргызстан ушул көркөм дүйнөдө өз ордун табат деп ишенесизби?
Гүлнур: Ушул суроого өзүм жооп таптым. Бир катар жылдан бери моданы окуп-таанып, өз көйнөктөрүмдү жасап жатам. Себеби Кыргызстанда башкаларга көрсөтө турган нерсе абдан көп, көп элдер аны билбейт. Европада азыр мода кайсы багытка кетип жатат - Леди Гага. Көчөгө чыксаңыз кара, боз түстөрдү көрөсүз. Мен көйнөктөрүмдү кийип чыксам бардыгы карашат.
Жакында Миланга барып келдим. Бул шаар дүйнөлүк моданын борбору саналат эмеспи. Миландын көп дүкөндөрүн кыдырдым. Көчөнүн оң жагындагы дүкөнгө кирсем, сол жагындагы дүкөнгө кирсем деле кийимдердин бардыгы бирдей түстө, бирдей үлгүдө. Ошондо мен кичинемден апамдан үйрөнгөн кыргыздын саймасы, курагы менен азыркы заманбап моданы айкалыштырып жасасам, андай нерсе эч жерде жок экендигин түшүндүм. Мен алектенип жаткан иш бул жерде жаңы багыт катары чыгат деп ойлойм. Кыргызстандагы кол өнөрчүлүктү азыркы заманбап үлгүгө өткөрүп, Европада көрсөтсөк, балким жаңы мода пайда болот.
P.S.
"Азаттыкка" тартуулаган сүрөттөрү үчүн Гүлнур Тоялиевага ыраазычылык билдиребиз. "Гүлнур" жараткан модалуу кийимдер тууралуу
http://www.gulnur.eu интернет сайтынан таанышууга болот.