Бүгүн Бишкекте билим берүү жана илим министри Канат Садыков Ош жана Жалал-Абаттагы айрым мектептердин жетекчилери жана мугалимдери менен жолугушту. Аталган министрликтин маалымдашынча, бул мугалимдер түштүктөгү июнь айындагы коогалуу окуяларда оор күндөрдү баштан өткөрүштү. Ушундан улам Ысык-Көлдө социалдык-психологиялык жана кесиптик реабилитациялоо курсуна катышып келишти. Мындай мүмкүнчүлүктү аларга ЮНЕСКОнун каржылык колдоосу астында "Билим берүү мекемелеринин союзу" түзүп берди. Аталган уюмдун планы боюнча жайында коогалаң болгон Ош жана Жалал-Абад аймагындагы мектептердин 550 мугалимин социалдык-психологиялык реабилитациядан өткөрүү каралган. (EBM)
