Гаитинин мурдагы диктатору «Бэби Док» деген лакап ысымга ээ болгон Жан Клод Дювалье 63 жаш курагында жүрөк оорусунан каза тапты.
Кариб аралындагы жакыр өлкөнү 1971-жылдан тарта 1986-жылга чейин башкарган Дювалье 4-октябрда көз жумганын Гаитинин саламаттыкты сактоо министри жарыялады.
Дювалье президенттиктен кеткенден кийин 25 жыл куугунтукта жүрүп, өз өлкөсүнө 2001-жылы кайтып келген.
Ал 19 жашында бийликке келип, дүйнөдөгү эң жаш президент эсептелген. Өлкө лидерлигин ал атасы Франсуа Дювальеден өткөрүп алган.
Ата-баланын башкаруу мезгили тарыхка эң кандуу жылдар катары кирип калды. Алардын “тонтон макут” деп аталган президенттик гвардиясынын жоокерлери учурунда 69 миң адамга чейин кырганы айтылып келет.