Дача айылындагы учак кырсыгынан келтирилген чыгымдарды калыбына келтирүү боюнча түрк тарап менен сүйлөшүүлөр уланууда. Бул тууралуу биринчи вице-премьер-министр Мухамметкалый Абулгазиев 11-февралда кырсыктын себептерин иликтөө боюнча өкмөттүк комиссиянын жыйынында билдирди. Анда белгилүү болгондой, ушул тапта авиакырсыктан жабыркаган 12 үй-бүлө Чүй облусунун жана Бишкек шаарынын аймагына бардык шарты бар убактылуу батирлерге көчүрүлдү.
Абулгазиевдин айтымында, жабыркагандарга компенсация төлөп берүү боюнча аракеттер көрүлүп жатат.
16-январда “Манас” аэропортуна жакын жердеги Дача СУ айылына Түркиянын жүк ташуучу учагы кулап, жыйырмадан ашуун үй талкаланган, 39 киши набыт кеткен.