Балыкчы - Каракол унаа жолунун 55-чакырымында «Тойота Прадо» үлгүсүндөгү унаа жөө жүргүнчүлөрдү сүзүп, үч адам көз жумду. Бул тууралуу "Азаттыкка" облустук милициянын басма сөз катчысы Сталбек Усубакунов билдирди.
Анын айтымында Чок-Тал айылынан Бишкек шаарын көздөй багыт алган унааны Бишкектин 32 жаштагы тургуну башкарып бара жаткан.
Адамдардын өмүрүн алган окуя кечээ 24-октябрда саат 20:30 чамасында болгон.
Жолдун жээгинде туруп өлүмгө учурагандар 36 жана 37 жаштагы эже-сиңди жана алардын биринин 1 жаш 9 айлык кызы экени аныкталды.
Учурда шектүү айдоочу Ысык-Көл ички иштер бөлүмүндө камакта. Ал унаанын ылдамдыгын ашырбаганын айткан. Бул факт боюнча териштирүү иштери башталды.
Айдоочу медициналык текшерүүдөн өткөрүлгөндө ал спирт ичимдигин ичпегени белгилүү болду. (AsM)