Москванын Тверская көчөсүндө жазуучу Александр Солженицынды эскерүү тактасы ачылды.
Такта жазуучу 1974-жылы жашаган үйдүн дубалына бекитилди. 1994-жылдан бери бул имаратта Солженицындын фонду иш алып барат. Ал эми эмдиги жылы жазуучунун 100 жылдыгына карата музейи ачылары күтүлүүдө.
«Гулаг архипелагы» романынын автору 2008-жылы Москвада көз жумган. Анын элесине арналган биринчи эстелик Белгороддо ачылган. Кийин Владивостокто орнотулган.
Өз романдарында советтик сталиндик эмгек лагерлердеги азаптуу жашоону чагылдырган Солженицын 20 жыл чет өлкөдө бозгунда жашаган.