Кыргызстан социал-демократиялык партиясынын (КСДП) экс-президент Алмазбек Атамбаев төрагалык кылган тобу Кыргызстандын аймагында уран кенин иштетүүгө каршы экенин кабарлап, атайын билдирүү таратты.
«2013-жылы Кыргыз Республикасынын демилгеси менен БУУнун Башкы ассамблеясы «Борбор Азиядагы радиациялык коркунучтун алдын алууда эл аралык коомчулуктун ролу жөнүндө» резолюция кабыл алган. 2017-жылы биздин партиянын лидери Алмазбек Атамбаев өзүнүн БУУнун Башкы ассамблеясында чыгып сүйлөгөн сөзүндө бул маселени кайрадан көтөргөн жана уран иштетүүдөгү коркунучтар туурасында билдирген»,-деп айтылат документте.
Партия өз мүчөлөрү буга байланыштуу нараазылык акцияларына жигердүү катышаарын билдирип, президенттен жана өкмөттөн уран кенин иштетүүгө жол бербөөнү талап кылган.
Коомчулукта Ысык-Көлдүн Көк-Мойнок айыл аймагындагы Кызыл-Омпол уран кенин иштетүүгө каршы маанай кийинки күндөрү күчөп кеткен. Буга байланыштуу бир катар нааразылык акциялары өттү.
22-апрелде өкмөт башчы Мухаммедкалый Абылгазиев уран кенинин ишин экологиялык экспертиза аяктаганга чейин токтотуп турууну тапшырган.(ErN)