Кошмо Штаттардын бийлиги Ормуз жана Баб-эл-Мандаб кысыктарында кемелердин ээн-эркин жүрүшүн көзөмөлдөгөн эл аралык коалиция түзүү мүмкүнчүлүгүн караштырууда. Бул тууралуу АКШнын Куралдуу күчтөр штабынын комитетинин башчысы, генерал Жозеф Данфорд 9-июлда журналисттерге билдирди.
Анын айтымында, коалицияны башкарууну Пентагон колго алат. Ал эми коалицияга кирген башка мамлекеттер деңиз жолдорун кайтарат.
- Биз азыр бир катар мамлекеттер менен коалиция боюнча иштеп жатабыз. Бул коалиция Ормуз жана Баб-эл-Мандаб кысыгында кемелердин коопсуздугун камсыздамак,- деди Данфорд.
Вашингтондун бул демилгеси Иран менен чыңалуу күчөп турган чакта жарыяланды.
Быйыл 13-июнда Оман булуңунда Жапония менен Норвегиянын мунай ташыган кемелерине чабул коюлган. АКШ чабуул үчүн Иранды айыптаса, Тегеран окуяга тиешеси жок экенин билдирип, бул чагымчыл аракет болушу мүмкүн экенин ишарат кылган.