Тажикстанда абактагы уулануу боюнча кылмыш иши козголуп, атайын тергөө тобу түзүлдү. Алар «Ууланууга нан себеп болдубу? Нанды ким берди – соттолуучулардын наны беле же түрмө кызматкерлери бергенби?» деген суроолорго жооп издешмекчи.
Тажикстандын Ички иштер министрлигинин басма сөз катчысы Умаржони Эмомали экспертиза жасалып жатканын билдирди:
- Ушул тапта үч экспертиза жүргүзүлдү, алар нандын сапатына жана курамына анализ жасашты. Дагы бир нече экспертиза жасалып, ууланууга нан себеп болдубу же жокпу, мына ушуну тактайт.
7-июлда бир абактан экинчисине которулуп бараткан 14 адам ууланып каза тапкан. Кырсык соттолуучуларды Согди облусунан башка шаарлардагы түрмөлөргө которуп жаткан маалда болду. Расмий маалымат боюнча, соттолуучулар нанга ууланган.