Казакстанда оппозициячыл журналист Сергей Дуванов түрмө дарыгерлери аны күч менен тамактандыргандан кийин мындан эки апта мурун жарыялаган ачкачылык акциясын токтотту. Дуванов октябрь айынын соңунда бойго жете элек кызды зордуктады деген айып менен камакка алынган. Бирок, журналисттин өзү жана анын жактоочулары бул атайлап уюштурулган жалаа жана Дуванов буга чейин жарыялаган сын макалалары үчүн бийликтин курмандыгы болууда деп эсептейт. Дуванов өз макаларында президент Назарбаевди да сынга алып, анын жашыруун банк эсептери жөнүндө жазган.
