БИШКЕК. Учурда акциялары мамлекеттин карамагында турган турган «Кайрат-банкты» Улуттук банк келерки жылы тендер жолу менен сатууга аракет жасайт , ал эми Эсептешүү-Сактык Компаниясынын акциясын өкмөткө өткөрүп берет. Бул тууралуу шаршембиде Улуттук Банкта өткөрүлгөн маалымат жыйынында өлкөнүн башкы банкынын башчысынын орун басары Каныш Шаршекеева маалымдады. «Кайрат-Банктын» уставдык капиталы 170 млн. сом, Эсептешүү-Сактык Компаниясыныкы болсо 100 млн. сом. Каныш Шаршекееванын айтымында, Улуттук Банк мындан ары да депозиттерди камсыздандыруунун механизмдерин иштеп чыгуу, коммерциялык банктарга корпоративдик башкарууну киргизүү, алардын жетекчилеринин жоопкерчилигин артыруу аракетин жасайт. «Биздин коммерциялык банктар бухгалтердик эсеп менен аудитти эл аралык стандартка ылайык жүргүзүүгө өтүш керек»,-деп белгиледи Каныш Шаршекеева.
