БИШКЕК. Шейшемби күнү укук коргоочу Турсунбек Акун: «2-февралдагы референдумда жарандардын укуктарынын одоно түрдө бузулганына байланыштуу Конституциялык жана Жогорку Сотторго кайрылам», - деп билдирди. Анын айтымында, референдумду өткөрүүдө аткаруу бийлиги мыйзам бузууларга барып, андай көрүнүштөр боюнча байкоочулар тарабынан көптөгөн протоколдор түзүлгөн. Мына ошол протоколдор өлкө сотторуна арыз менен кайрылууга негиз болмокчу. Кыргызстандын Укук коргоо кыймылынын лидери Турсунбек Акун референдумга көзөмөл жүргүзүү боюнча коомдук штабдын атынан Нарын облусундагы добуш берүүгө байкоо салып келген.
