Кеңири кыруучу куралдын изи Иракта табыла электигин АКШнын мамлекеттик катчысы Колин Пауэлл "Уолл стриит жорнел" гезитинде 4-февралда жарыяланган макаласында мойнуна алат. Бирок, анын айтымында, Ирак жетекчилиги эл аралык коомчулуктун пикирин тоготпогонун да унутпаш керек. Бириккен Улуттар Уюмунун инспекторлорунун башчысы Ханс Бликс Нью-Йорк шаарынан жана Өзөктүк кубат боюнча эл аралык агенттиктин башчысы Мухаммед ал-Барадейи Вена шаарынан бүгүн Ирак өкмөтүн сынга алды. Алардын айтымында, Ирак жетекчилиги текшерүүчүлөр менен талаптуу деңгээлде кызматташпай жатат.
