Өзөктүк кубат боюнча эл аралык агенттиктин башчысы Мохаммед ал-Барадей 21-февралда Тегеранга келди, анткени АКШнын талабы менен Ирандагы өзөктүк ишканалар инспекцияга алынууга тийиш. Сапар учурунда ал-Барадей президент Мохаммад Хатами менен дагы жолугат. Инспекторлор Бушер шаарындагы өзөктүк электр станциясын жана Арак менен Натанц аймактарындагы өзөктүк ишканаларды текшерет. АКШнын айтымында, Орусиянын жардамы менен Бушерде курулган станцияны өзөктүк курал өндүрүү үчүн пайдаланса болот. Иран менен Орусия андай күнөөнү четке кагууда.
