БИШКЕК. «Кыргызстан демократиялык кыймылы» партиясынын лидери Виктор Черноморец 24-февралда Кыргызстандын президенти Аскар Акаевге, премьер-министр Николай Танаевге жана жалпы элге кайрылуу таратты. Анда партия лидери «Эгемендүү Кыргызстандын 12 жылдык тарыхындагы башкы сыймыгыбыз - өлкөдөгү тынчтык жана улут аралык ынтымак гана болду», деп билдирип, Аксы окуясында 5 адамдын жана Шералы Назаркуловдун саясий ачкачылыктан каза болушун «өлкөдө чыныгы демократияны орнотуу жолундагы өлүм болду» деп атады. Виктор Черноморец бейкүнөө жерден көз жумган адамдардын каны төгүлгөн жана алардын сөөгү коюлган жерге мечит куруп, 17-мартты Улуттук аза күтүү күнү деп белгилөөнү президентке жана премьер-министрге сунуш кылды.
