БИШКЕК. 28-февралда Москва шаарында Евразия экономикалык кызматташтык уюмунун мамлекет аралык кеңешинин жыйыны өткөрүлөт. Ага катышканы бейшемби күнү Кыргызстандын өкмөт башчысы Николай Танаев Москвага жөнөп кетти. Өкмөттүн маалымат кызматынын кабарына караганда, отурумда уюмга кирген өлкөлөрдүн ортосундагы экономикалык кызматташтыкты чыңдоого байланышкан маселелер каралат. Ошондой эле жыйындын катышуучулары уюмга кирген өлкөлөрдүн ортосунда буга чейин кабыл алынган экономикалык келишимдердин аткарылышын, келечекте уюмдун алкагында бирдиктүү салык системасын киргизүү тууралуу макулдашуунун долбоорун талкууга алышат.
