БАРАК АЙЫЛЫ: ТОСУЛГАН ЖОЛ, ЧЕК АРА АЗАБЫ, САТЫЛБАГАН ПАХТА

“Азаттыктын” кезектеги “тегерек үстөл маеги Ош облусунун Карасуу районундагы “Акташ” айыл өкмөтүнө караштуу Барак айылында өттү. Өзбекстандын аймагында калган кыргыз кыштагынын көйгөйү жалпыга маалым. Өзбекстан Баракка бараткан машина жолду жаап салган соң анклав жашоочуларынын жакын турган Карасуу, Ошко катташуусу кыйынга туруп калган. Ушул жылдын 12-мартында Ташкенде кыргыз-өзбек өкмөттүк делегациясы ортодогу жолду ачуу жөнүндөгү макулдашууга кол коюшту. Барак айылында өткөн эл менен бийлик өкүлдөрүнүн жыйынында чек ара маселеси, дыйкандарды түйшөлткөн көйгөйлөр жайында кеп болду.