БУУнун Коопсуздук Кеңеши Түндүк Кореянын болжолдуу өзөктүк куралдар программасын талкуулайт

Пхеньян Коопсуздук Кеңеши Түндүк Кореяга каршы кандайдыр санкцияларды киргизсе, аны "согуштун башталышы" катары кабыл алаарын эскерткен. Вашингтон Кеңештин мүчөлөрүнө Пхеньянды Өзөктүк куралдарды жайылтпоо жөнүндөгү эл аралык келишимден чыкканы үчүн айыптаган билдирүү кабыл алууну сунуш кылмакчы. Бирок, ал документ Коопсуздук Кеңешинде колдоо табаары күмөндүү, анткени Орусия менен Кытай кечээ Түндүк Корея кризисин талкуулоодон майнап чыкпайт деп белгилешкен. Шаршембиде Түндүк Корея Жапонияны чөлкөмдөгү чыңалууну күчөтүп жатат деп күнөөлөп, Жапония Пхеньяндын куралдары мээлей алчу буталардын бири экенин эскертти.