ОППОЗИЦИЯ АЛСЫРАГАН ЖОК, АЛ ӨЛКӨДӨГҮ КЫРДААЛДАН УЛАМ ЭЛ МЕНЕН БИРГЕ ИШ-АРАКЕТИН ӨЗГӨРТТҮ

Кыяс Молдокасымов, Бишкек Кыргызстанда оппозициянын абалы кандай? Анын үнү бийликке угулуп, элге жетип жатабы? Оппозициялык күчтөрдүн аракеттерине бийлик бут тосуп, алсыратып койдубу? Же болбосо бийлик элдин мүдөөсүн толук канааттандырып, оппозиция доомат койгонго эч себеп калбай калдыбы же өлкө стабилдүү өнүгүү жолуна түштүбү? Мына ушул жана башка маселелердин тегерегинде тегерек столдо талкуу өткөрүү максатында студияга тарых илимининин доктору, «Жаңы Кыргызстан» партиясынын жетекчиси Досбол Нур уулун, Мыйзам чыгаруу жыйынынын депутаты, "Кыргызстан" тобунун жетекчиси Ишенбай Кадырбековду, Кыргызстан Калкы Ассамблеясынын төрагасы, Мыйзам чыгаруу жыйынынын депутаты Иса Токоевди чакырган элек. Эскерте кетүүчү жагдай биз чакырган убакта студияга Досбол Нур уулу менен Ишенбай Кадырбеков келип, Иса Токоев келе албай калганына байланыштуу анын пикирин өзүнчө жазып алып пайдаланууга туура келди.