Катардык "Ал-Жазира" телеканалы шаршембиде Усама бин Ладендин башкы орун басары, египеттик Айман Ал-Завахринин үнү жаздырылган тасманы угузду. Завахри анда бардык мусулмандарды америкалык жарандарга, компанияларга, Батыштын өкүлдөрүнө, жөөттөргө каршы куралдуу чабуул коюуга, Израилди исламдын жергесинен сүрүп чыгарууга үндөгөн. "Ал-Жазира" бул аудиокассетаны кайдан алганын кабарлаган жок жана анда жаздырылган үн "Ал-Каиданын" жетекчилеринин бири Ал-Завахриге таандык экенин да эч ким азырынча тастыктай элек.