Өлгөндөрдүн арасында жан кечти террорчу аял да бар. Жарат алгандардын айрымдары оор абалда. Террорчу аял автобустун жанына барып, киймине катылган бомбаны жардырып жибергени айтылат. Автобус Моздоктогу авиабазанын аскердик жана карапайым кызматкерлерин ташып бараткан. Орусиянын коопсуздук кызматы чечен лидери Аслан Масхадов Түндүк Осетиядагы жардыруу жөнүндө алдын ала кабардар болгон деп божомолдойт. Масхадовдун өкүлү Саламбек Маигов бул божомолду төгүнгө чыгарууда.
