Түркмөнстан кош жарандуулукту жойгонуна байланыштуу, орус саясатчылары Ашгабатты катуу сынга алууда. Мамлекеттик думанын Эл аралык маселелер боюнча комитетинин төрагасы Дмитрий Рогозиндин пикиринде, Ашгабат Түркмөнстандагы орустарга каршы согуш баштады. Мурдагы советтик жумурияттар менен кызматташуу комитетинин төрагасы Андрей Кокошиндин айтымында болсо, Маскөө Түркмөнстанга каршы чектөө салууга тийиш. Мындан эки ай мурда Ашгабат кош жарандуулугу бар адамдар бир өлкөнүн жарандуулугун тандап алууга тийиш деген чечим чыгарган жана андай кылуунун мөөнөтү 15-июнда аяктады.
