ЖАЛАЛАБАД. Алар бир ай мурун Өкмөт Үйүнүн алдына жакындатпай көчөдөн кармап уруп-сабаган бишкектик милиция кызматкерлерине чара көрүүнү талап кылышты. Чогулгандар «ал боюнча кылмыш иши козголбойт» деген Биринчи Май райондук прокуратурасынын жообуна нааразылыгын айтышты. Президенттик администрация башчысынын милдетин аткаруучу Мисир Ашыркуловго тапшырылган аксылык энелердин кайрылуусуна жооп берилбегени, жолдо келаткандарга ок аткандар жоопко тартылбаганы айтылды. Жабырлангандар «аскер соту тарабынан мурда акталган район жетекчилери кайра кызматын улантсын» деген тилектерин айтышты. Район акими Абдималик Эгембердиев окуяда жабыркагандардын ишин сот органдары чечээрин түшүндүрдү.
