БИШКЕК. Август айынын этегинде Транспорт жана байланыш министрлигинин темир жол башкармалыгы Балыкчы-Каракече темир жолунун Балыкчы-Кочкор багытын курууга киришет. Премьер-министр Николай Танаев курулуш боло турган жерди жума күнү кыдырып чыккан соң ушундай чечимге келди. Кыргыз өкмөтүнүн маалымат кызматынын бүгүнкү кабарына караганда, 65 чакырым аралыкты ээлеген бул темир жолдун курулушуна 5-7 млн. сом каражат сарпталаары болжолдонууда. Түндүк-түштүк стратегиялык темир жолунун башаты катары мындан бир нече жыл илгери башталган курулуштун ашар ыкмасы өзүн актабагандыктан, токтоп калган.