БИШКЕК. 30-август. Бүгүн дүйнө кыргыздарынын 2- курултайына катышкан 300дөн ашуун делегат Чолпонатадан Бишкекке кайтып келишип, борбор калаадагы майрамдык иш-чараларга катыша башташты. Бул күнү алар 1937- жылы репрессиянын курмандыктары болгон адамдардын сөөгү коюлган «Ата бейит» мемориалдык комплексиндеги эскерүү аземине катышты. Кечкисин кыргыз мамлекеттүүлүгүнүн 2200 жылдыгына арналган кыргыз көркөм өнөр чеберлери менен жогорку окуу жайларынын студенттеринин катышуусунда борбордук аянтта даярдалган «Улуу түндүк» аттуу театрлаштырылган оюн-зоок көргөзүлдү.
