Италияга келген орус президенти Владимир Путин кечээ күнү Рим шаарында өлкө президенти Карло Чиампи, премьер-министр Силвио Берлускони, Папа Иоанн Павел Экинчи менен жолукту. Маалымат жыйынында ЮКОС компаниясы тууралуу берилген суроого жооп берип жатып, Путин орус өкмөтүн да сынга алды. Анын айтымында, ЮКОСтун мунай өндүрүү лицензиясын алып салуу чоң ката болот. Бүгүн Путин Италияда - Орусия менен Европа Биримдиги ортосундагы бийик жолугушууга катышат.
