БИШКЕК. 2-декабрда Жогорку Кеңештин Мыйзам чыгаруу жыйыны «Рентон групп» компаниясынын айланасында түзүлгөн кырдаалды талкуулоону аяктап, токтом кабыл алды. Ага ылайык, чатакты иликтөө боюнча мамлекеттик комиссия түзүү маселесин карап көрүү президентке сунушталды. Ал эми өкмөткө жабырлангандардын акчасын кайтаруунун жолдорун аныктоону, күнөөлүүлөрдү жазалоону тапшырышты. Ички иштер министрлигинин маалыматы боюнча, «Рентон групп» компаниясынын качып кеткен жетекчилиги 5 миңдей атуулдун 158 млн. сомун өзүнө ыйгарып алган. Айрым депутаттардын эсеби боюнча, бул сумма 300 млн. сомдун айланасында.
