БИШКЕК. Экономикалык кызматташуу боюнча кыргыз-казак өкмөттөр аралык комиссиянын өткөн аптадагы жыйынында эки тараптуу кызматташууну андан ары өнүктүрүү боюнча протоколго кол коюлду. Анда өткөн жылга салыштырмалуу быйылкы жылдын 9 айында эки мамлекеттин ортосунда соода 40% өскөнү белгиленген. Тараптар ошондой эле, 2004-жылы суу-энергетика ресурстарын биргелешип пайдалануу жана эларалык автоунаа каттамы боюнча келишимдерди даярдоого макулдашкан. Сүйлөшүүнүн жүрүшүндө казак тарап Кыргызстанга 200 миң тонна буудай сатууга ниетин билдирген. Бул тууралуу дүйшөмбү күнү Кыргызстандын Тышкы соода жана өнөржай министрлигинен кабарлашты.
