БИШКЕК. Бүгүн мигранттардын эларалык күнү. Кыргызстан аймагында бул датага байланыштуу атайын иш-чаралар өткөн жок. Тышкы иштер министрлигинин алдындагы миграция департаментинин маалымдаганына караганда, учурда Орусияда 300 миңдей, Казакстанда 120 миңдей кыргызстандыктар иштешет. Эксперттердин айтымында, калктын өлкө ичиндеги миграциясы социалдык олуттуу көйгөйлөрдү жаратууда. Акыркы 12 жылда өлкө ичинде 1 млн. 200 миң атуул жер которгон. Бул билим берүү, саламаттык сактоо, турак-жай, унаа менен камсыздоо өңдүү социалдык маселелердин чечилишин оорлотууда. Жер которгондордун басымдуу бөлүгү Бишкек баштаган чоң шаарлардагы базарларда соода кылышат.
