БИШКЕК. Башкы прокуратура Жогорку Кеңештин айрым депутаттарынын иш бөлмөлөрүнөн табылган тыңшоочу аппараттарды көз карандысыз эксперттерге текшертүүгѳ макулдук берди. Башкы прокуратуранын өзү да кылмыш ишин ачып, иликтөө иштерин жүргүзүп келген. Бул тууралуу тыңшоочу аппараттарга байланыштуу окуяны иликтөө боюнча түзүлгөн депутаттык комиссиянын мүчөсү, депутат Алишер Абдымомунов жекшембиде билдирди. Анын айтымында, комиссия мүчөлөрү Улуттук коопсуздук кызматы жана Ички иштер министрлиги баштаган күч органдарын мыйзамда белгиленген чекте текшере алат. Ошондой эле комиссия мүчөлөрү Өкмөт үйүнө жашыруун жетип турган маалыматтарды да иликтемекчи.
