БИШКЕК. Бүгүн Кыргызстанда мусулмандардын Курман айт майрамы белгиленди. Курман айт намазы Бишкектин эски өкмөт аянтында окулуп, намазга борбордун 10 миңге чукул тургуну чогулду. Айт намазды кыргыз мусулмандарынын муфтийи Муратаалы ажы Жуман уулу окуп, чогулгандарды биринчи вице-премьер министр Курманбек Осмонов, Бишкектин мэри Медетбек Керимкулов, АКШнын, Ирандын, Түркиянын Кыргызстандагы элчилери куттукташты. Курманбек Осмонов өлкөдөгү бейкуттукту камсыз кылууда өкмөт менен диний мекемелердин эриш-аркак иштеп жаткандыгын белгиледи.
