БИШКЕК. Бүгүн Жогорку Кеңештин Мыйзам чыгаруу жыйынынын депутаттары бир апталык тыныгуудан кийин ишин улантышты. Отурумда депутаттар адегенде бүгүнкү күндө жер-жерлерде орун алып жаткан проблемалар жөнүндө маалымдашты. Алар өткөн аптада өздөрүнүн шайлоо округдарында болуп, жер-жерлердеги абал менен таанышып келишкен. Депутаттардын көпчүлүгү белгилешкендей, учурда дээрлик бардык райондордо жазгы-талаа иштерине даярдыктар начар, айыл-чарба техникасы, күйүүчү-майлоочу майлар жетишсиз болуп жатат. Шайлоочулар тарабынан айтылган башкы маселелердин бири электр жарыгынын өчүрүлүшүнө байланыштуу болд. Андан соң депутаттар «Өкмөт жөнүндө» мыйзам долбоорун талкуулоону улантышты. Өзгөчө талаш-тартыштарды мыйзам долбоорунун 4-беренеси пайда кылды. Палатанын депутаттарынын негизги бөлүгү өкмөттүн түзүмүнө минитсрлик, комитет, комиссиялар менен бирдикте жергиликтүү мамлекеттик администрацияларды киргизүүнү сунушташты. Бирок ал сунуш көпчүлүктүн колдоосуна ээ болгон жок.
