Москванын чак ортосунда, Манеж деп аталган көргөзмө борборундагы өрттү өчүрүү учурунда эки адамдын өмүрү кыйылды. Эки өрт өчүргүч өрттөнүп жаткан имараттын чатырынын урап түшүүсүнөн улам каза тапкан. Манеж көргөзмө борбору Кремлге жакын жайгашкан, жүздөгөн өрт өчүргүчтөрдүн аракетине карабай, 1817-жылы ачылган бул тарыхый имарат иш жүзүндө толугу менен талкаланды. Орусия башкалаасынын мэри Юрий Лужковдун билдиргенинен караганда, өрт имараттын желдетүү системасындагы туура эместиктерден келип чыккан.
