БИШКЕК. Кыргыз өкмөтүнүн алдындагы экономикалык саясат боюнча кеңеш тарабынан өлкөнүн 2005-2007-жылдарга эсептелген бюджеттин долбоору жактырылды. Бул тууралу бүгүн өкмөттүн маалымат кызматынан билдиришти. Орто мөөнөт менен эсептелген бул документте бюджеттеги ресурстардын өлчөмү анализденип, айыл-чарба, саламаттык сактоо жана билим берүү тармактарына 2005-2007-жылдары каражаттын сарпталышы каралган. Экономикалык саясат боюнча кеңеш тарабынан каржы жана башка министрликтерге 2005-жылга карата бюджет жөнүндөгү мыйзам долбоорун иштөөгө киришүү тапшырылды. Кийинки жылга эсептелген бюджет жөнүндөгү мыйзам долбоору жана өлкөнүн Салык кодексинин жаңы редакциясынын долбоору ушул жылдын август айында парламенттин кароосуна сунушталат.
