БИШКЕК. Өткөн айда Ташкенде болгон жардырууларга байланыштуу өлкөнүн ички иштер органдарынын кызматкерлери күчөтүлгөн тартипте иштөөнү улантышууда. Республиканын бардык аймактарында атуулдардын паспорттору, автоунаалар күчөтүлгөн тартипте текшерилүүдө. Ички иштер министрлигинин маалымат кызматынан бүгүн билдиришкендей, күчөтүлгөн тартип киргизилгенден бери өлкө боюнча өзгөчө кырдаал түзүлгөн учур катталган жок. 30-март күнү ички иштер министринин буйругу менен өлкөнүн ички иштер органдары күчөтүлгөн тартипте иштөөгө өткөрүлгөн жана анын мөөнөтү Өзбекстандагы кырдаалдын турукташканына жана өлкөдөгү жагдайга байланыштуу болот.
