БИШКЕК. Бүгүн Бишкекте Лениндин эстелигинин алдында бир катар саясий партия өкүлдөрү 1-май эмгекчилердин эларалык күнүнө карата митинг өткөрүштү. Ага «Коммунистер», «Жаңы Кыргызстан», «Атамекен» партияларынын жана бейөкмөт уюмдардын өкүлдөрү катышты. Чогулган элдин алдына Коммунистер партиясынын жетекчилери Абсамат Масалиев, Клара Ажыбекова чыгып сөз сүйлөшүп, эмгекчилерди биринчи май майрамы менен куттукташты.
