БИШКЕК. 2010-жылга чейин Кыргызстандагы ар бир үй-бүлө интернет байланышына туташтырылган компьютер менен камсыз болот. Бул тууралуу өлкөнү маалымат байланыш технологиясы менен камсыз кылуу боюнча улуттук пландын ачылыш аземинде биринчи вице-пермьер-министр Кубанычбек Жумалиев билдирди. Анын айтымында, учурда аталган программанын алкагында эл аралык уюмдар берген каражатка ар бир облус, район, шаарлардын борборунда маалымат интернет байланыш борборлору ачылууда. Ошондой эле мындай улуттук пландын алкагында "электрондук өкмөт" түзүү, электрондук билим берүү камсыз кылынат.
