БИШКЕК. Бүгүн президент Аскар Акаев ЕККУга мүчө беш мамлекеттин азыр Кыргызстанда жүргөн элчилери менен жолугушту. Анда мамлекет башчысы уюм менен Кыргызстандын кызматташуусу маанилүү эки багытта: демократиялык институттарды жана адам укуктарын сактоону бекемдөө багытында болуп жаткандыгын баса белгилеп, ЕККУнун Бишкекте ачылган академиясы терроризм менен экстремизмге каршы күрөшүүдө, регионалдык кызматташууну өркүндөтүүдө башкы борбор боло тургандыгын билдирди. Андан тышкары терроризмди ооздуктоо үчүн кедейликти жоюу зарылдыгын белгиледи.
