БАТКЕН. Баткен облусунда аялдардын демилгелүү топтору түзүлүүдө. Үй-бүлө жана аялдар иши боюнча облустук департаменттен 8-июнда алынган маалыматка караганда, учурда облустун баардык район, шаарларында, айыл өкмөттөрүндө элди ашыкча чыгымга кириптер кылуучу улуттук каада-салттарды кыскартууну талкуулаган жыйындар өтүүдө. Облус бийлигинин демилгеси менен аталган департамент уюштурган бул жыйындарга дарыгерлер да катышып, ар кандай жугуштуу оорулардын алдын алуу, үй-бүлөнү ыраатташтыруу боюнча да кеп-кеңештер айтылууда. Мындан сырткары жыйын өткөн жерлерде демилгелүү аялдардын топтору да түзүлүүдө. Алар айлана-чөйрөнү көрктөндүрүү, ашыкча каада-салттарды кыскартуу зарылдыгын элге түшүндүрүү, жамааттык топторду түзүп, турмуш шарты начар үй-бүлөлөргө жардам көрсөтүү жана маданий иш-чараларды уюштуруу сыяктуу иштерди жүргүзүшмөкчү. Учурда демилгелүү аялдар тобунун мүчөлөрүнүн саны облус боюнча 480 жетти. Мындай топтор Кызылкыя шаарында жана Баткен, Лейлек райондорунда түзүлүп, иш жүргүзүлө баштады.
