БИШКЕК. Кыргызстанда мындан ары кызмат көрсөтүүнү экспорттоодон кошумча нарк салыгы алынбайт. Ага негиз берген өзгөртүү Салык кодексине киргизилди жана ал мыйзамга президент Аскар Акаев ушул айдын башында кол койду. Мындай маалыматты бүгүн Каржы министрлигинин басма сөз кызматы таратты. Ал маалыматка караганда, Салык Кодексине киргизилген бул өзгөртүү өлкөдөгү ишканалардын экспорттоо жөндөмдүүлүгүн арттырып, кызмат көрсөтүү кызматын өнүктүрүүгө жол ачат.
