БИШКЕК. «Эл бийлиги үчүн» шайлоо блогунун курултайы 25-сентябрда болоору күтүлүүдө. Бул тууралуу блоктун лидери, Мыйзам чыгаруу жыйынынын депутаты Азимбек Бекназаров бүгүн билдирди. Анын айтымында, курултайга өлкөдөгү бардык оппозициялык күчтөр чакырылып, анда келерки жылдагы шайлоого даярдык көрүү маселесин талкуулоо белгиленүүдө. Курултайда оппозиция тараптан 75 шайлоо округу боюнча Жогорку Кеңештин депутаттыгына талапкерлер көрсөтүлүп, ошондой эле президенттикке бирдиктүү талапкердин аты аталмакчы.
