МОСКВА. Түндүк Осетиянын Беслан шаарында барымтада курман болгон адамдардын дагы бир бөлүгү жайына коюлду. Россиянын баш прокурору Владимир Устиновдун билдиргенине караганда, 326 кишинин курман болгондугу аныкталды, 220 кишинин сөөгү таанылып, туугандарына берилди. Жараат алгандардын саны 700 кишини түздү. Россиянын ооруканаларында дагы 350 киши кала берүүдө. Ал эми баш прокурордун түштүк чөлкөмдөр боюнча орун басары Сергей Фридский тергөө учурунда 12 барымтачынын ким экени аныкталганын билдирди.
