Бириккен Улуттар Уюму бүгүн Брюссел шаарында Ооганстан тууралуу атайын доклад жарыялады. Анда - өлкөдөгү апийим өндүрүү акыркы мезгилде эбегейсиз өсүп кеткени тууралуу айтылат. 2003-жылы апийим соодасынан 2 миллиард 800 миллион доллар түшкөн. Бул киреше өлкөнүн дүң өндүрүшүнүн 60 пайызын түзөт. Быйыл болсо апийим өстүрүү өлкөдө дагы өстү. Азыр дүйнөдө өндүрүлгөн апийимдин 87 пайызы Ооганстандан чыгат. Докладдын автору Антонио Мариа Костанын айтымында, бул маселени Ооганстан өзү жалгыз чече албайт.
