Орусиянын ЮКОС компаниясынын акцияларынын баасы кечээ күнү Маскөөдөгү биржада бир доллардан төмөн түштү. Октябрда бир акция эки долларга жакын турган. Өлкө прокурорлору компанияны салык төлөөдөн качкан деп, андан 25 миллиард доллар талап кылууда. ЮКОСтун башчысы, Орусиянын эң бай адамы Михаил Ходорковский мындан бир жыл мурда камакка алынган, компаниянын америкалык башкаруучусу Стивен Тид кечээ күнү Лондондон атайын жарыя жасап, орус өкмөтү ЮКОСТУ толугу менен жок кылууну көздөөдө деп билдирди.
