БИШКЕК. 15-январда Бишкекте Жогорку Кеңештин имаратынын алдында Кыргызстандын мурдагы тышкы иштер министри Роза Отунбаеваны коргоо Комитети нааразылык акцияны улантты. 20дан ашуун пикетчи «Кыргызстандагы шайлоо адилет өткөрүлсүн», «№1 Университет округунун шайлоо комиссиясынын чечими өзгөртүлсүн» деген плакаттар менен турушту. Роза Отунбаеванын укуктарын коргоо боюнча Комитет нааразылык акцияны 16-январда да улантат. «Ашар» коомунун өкүлдөрү билдиришкендей, 15-январда алардын кеңсесинде Бишкек шаарынын ички иштер башкармалыгынын кызматкерлери болуп, Кыргызстандын мурдагы элчиси Роза Отунбаеванын укугун коргоо боюнча иш-чараларды жүргүзүүнү токтоткула деген көрсөтмө беришти.
